TV-aksjonen 2024

Annakvar dag får eit barn i Noreg kreft, og kvar veke vert 10 born født med hjartefeil. Når eit barn vert sjukt, vert heile familien ramma. Ofte må barnet reisa langt for å få livsviktig behandling, og familien vert splitta i lange periodar.

I år går TV-aksjonen til Barnekreftforeningen, som skal etablera familiehus ved universitetssjukehusa i Tromsø, Trondheim, Bergen og Oslo. Her kan born med alvorleg sjukdom og familien deira bu saman medan barnet får behandling. Slik vert også syskjen ivaretekne, og familien kan skapa gode stunder i ei vanskeleg tid.

Familien får mogelegheit til å skapa ein heim heimefrå. Dei kan støtta kvarandre gjennom den vonde og vanskelege perioden, og få etterlengta pausar frå sjukehuset sine alvorstunge korridorar.

Voss Sparebank har lang tradisjon for å støtta den årlege TV-aksjonen, både med ei pengegåve til aksjonen, og ved å telja opp bøssene på aksjonsdagen. Banken har i alle år vore oppteljingsbank for Voss herad, som no også omfattar gamle Granvin herad. Dei siste åra har me også teke i mot og talt bøssene frå Vaksdal, Eidfjord og Ulvik. Oppteljinga vert gjort på dugnad av dei tilsette i banken.

Du kan gje ditt bidrag til aksjonen på ulike måtar. På aksjonsdagen vil det gå rundt bøssebærarar og samla inn pengar. Du kan også gje ditt bidrag til aksjonen i elektroniske bøsser, eller via Vipps, konto, telefon eller kort. Les meir om måtar å gje bidrag på på aksjonen sine nettsider.

Bidrag frå næringsliv, organisasjonar, skular, barnehagar, lag og foreiningar, trussamfunn m.m. skal registrerast i nettportalen Giverstafett.